ກິດຈະກຳປູກຕົ້ນໄມ້ ທີ່ສະໜາມກ໋ອບ ລາວເອເຊຍ ເມືອງວັງວຽງ

ຄະນະນໍາເມືອງວັງວຽງ, ລັດວິສາຫະກິດ ລາວ-ເອເຊຍ ໂທລະຄົມ ແລະ ບໍລິສັດ ສະຕາ ໂທລະຄົມ ຈຳກັດ ຈັດກິດຈະກຳປູກຕົ້ນໄມ້
.........................................
ວັນທີ 31 ພຶດສະພາ 2025 ນີ້, ຄະນະນໍາເມືອງວັງວຽງ ແຂວງວຽງຈັນ, ລັດວິສາຫະກິດ ລາວ-ເອເຊຍ ໂທລະຄົມ ແລະ ບໍລິສັດ ສະຕາ ໂທລະຄົມ ຈໍາກັດ ໄດ້ຈັດກິດຈະກຳປູກຕົ້ນໄມ້ ແລະ ປ່ອຍປາ ເນື່ອງໃນໂອກາດວັນເດັກນ້ອຍສາກົນ ຄົບຮອບ 101 ປີ (1 ມິຖຸນາ 1924-1 ມິຖຸນາ 2025) ແລະ ວັນປູກຕົ້ນໄມ້ແຫ່ງຊາດ ຄົບຮອບ 45 ປີ (1 ມິຖຸນາ 1980-1 ມິຖຸນາ 2025 ), ເຊິ່ງພິທີດັ່ງກ່າວໄດ້ຈັດຂຶ້ນຢູ່ ທີ່ສະໜາມກັອຟ ຂອງລັດວິສາຫະກິດ ລາວ-ເອເຊຍ ໂທລະຄົມ ທີ່ ເມືອງວັງວຽງ ແຂວງວຽງຈັນ, ໂດຍການເປັນປະທານ ຂອງສະຫາຍ ພົນໂທ ສຈ ປອ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ, ມີການນໍາເມືອງວັງວຽງ, ບັນດາຜູ້ຕາງໜ້າຈາກຫ້ອງວ່າການກະຊວງປ້ອງກັນປະເທດ, ລັດວິສາຫະກິດ ລາວ-ເອເຊຍ ໂທລະຄົມ, ບໍລິສັດ ສະຕາ ໂທລະຄົມ ຈໍາກັດ, ປະຊາຊົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ພອນແກ້ວ ຂຸນພົນ ເຈົ້າເມືອງ ເມືອງວັງວຽງ ໄດ້ລາຍງານຫຍໍ້ກ່ຽວກັບການກະກຽມພິທີປູກຕົ້ນໄມ້ໃນຄັ້ງນີ້. ຈາກຊັ້ນ, ສະຫາຍ ພົນໂທ ສຈ ປອ ວົງຄໍາ ພົມມະກອນ ໄດ້ກ່າວເປິດພິທີຢ່າງເປັນທາງການ, ພ້ອມທັງໄດ້ກ່າວວ່າ: ໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ກຳລັງສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ໄລຍະທ້າຍສະໄໝ ຢ່າງຕັ້ງໜ້າ ແລະ ເປັນຂະບວນການຟົດຟື້ນ ເຊິ່ງໃນນັ້ນ, ພັກ-ລັດຖະບານ ຍາມໃດກໍຖືເອົາວຽກງານຄຸ້ມຄອງປົກປັກຮັກສາ ແລະ ພັດທະນາປ່າໄມ້ ເປັນວຽກງານຍຸດທະສາດສຳຄັນ ຂອງການພັດທະນາເສດຖະກິດ-ສັງຄົມແຫ່ງຊາດເພື່ອເປັນການປະຕິບັດບັນດາແຜນຍຸດທະສາດປ່າໄມ້ ແລະ ຄາດໝາຍທາງດ້ານສີ່ງແວດລ້ອມ ທີ່ກອງປະຊຸມໃຫຍ່ ຂອງພັກວາງອອກ ໃຫ້ປາກົດຜົນເປັນຈິງ ໃນການປູກຕົ້ນໄມ້, ຟື້ນຟູປ່າຄືນຄວາມອຸດົມ ສົມບູນໃຫ້ແກ່ທຳມະຊາດ, ທັງເປັນການຮັດແໜ້ນຄວາມສາມັກຄີ ລະຫວ່າງ ທ້ອງຖິ່ນທີ່ມີທັ້ງການພັດທະນາເສດຖະກິດຂອງລັດວິສາຫະກິດຂອງກອງທັບ ແລະ ເປັນສ່ວນໜຶ່ງໃນການມີສ່ວນຮ່ວມການຈັດຕັ້ງການຜັນຂະຫຍາຍນະໂຍບາຍການພັດທະນາແບບຍືນຍົງ ແລະ ເປັນສີຂຽວ ຂອງລັດຖະບານ.
ສໍາລັບຕົ້ນໄມ້ທີ່ນໍາມາປູກມີ: ຕົ້ນໄມ້ອຸດສະຫະກຳ, ຕົ້ນໄມ້ປະດັບ ແລະ ຕົ້ນໄມ້ກິນໝາກຈຳນວນ 3.000 ກວ່າຕົ້ນ ແລະ ປ່ອຍປາປະສົມ ຈໍານວນ 8.000 ກວ່າໂຕ.